Offisiere verkrag glo twee jong rekrute
2010-12-07 06:53
Die Burger
Pretoria - ’n Strafregtelike ondersoek deur die militêre polisie is onderweg nadat minstens een vroulike rekruut by die lugmag se gimnasium in Hoedspruit glo deur ’n adjudant-offisier bedwelm en toe verkrag is.
Dié rekruut ontvang tans berading en gebruik ook antiretrovirale middels nadat sy en nog ’n vroulike rekruut glo gedwing is om saam met twee besoekende adjudant-offisiere na ’n gastehuis te gaan.
Die twee mans – een van die Ysterplaat-lugmagbasis en die ander een van Durban – het juis as deel van die rekrute se induksie vir hulle lesings gegee oor hoe om seksuele teistering in die militêre omgewing te hanteer.
Siphiwe Dlamini, woordvoerder van die departement van verdediging, het vandeesweek bevestig die saak word ondersoek.
Tot op hede is geen stappe teen die twee adjudant-offisiere gedoen nie, terwyl die twee meisies die afgelope week hul basiese opleiding voltooi het.
Dit is die soveelste klagte oor vergrype by die gimnasium waaroor vanjaar berig is, maar waaraan daar oënskynlik min gedoen word. Minstens die derde raad van ondersoek sal nou ná die verkragtingvoorvalle gedoen word.
Volgens ’n familielid van die een meisie (19) het die twee adjudant-offisiere sowat twee weke gelede vir die rekrute klas gegee. Hulle het gevra of die meisies hulle kan help met die voorbereiding van sertifikate vir die studente.
Die een meisie wou nie gaan nie, maar ’n senior instrukteur het aan haar gesê dit is ’n opdrag. Die twee is toe saam met die mans na ’n gastehuis by die Drakensig-woonbuurt naby die basis.
Volgens die familielid het die twee vir die meisies koeldrank aangebied. Kort daarna het die een meisie begin naar word en gedisoriënteerd geraak. Toe sy in die toilet gebraak het, het die een man haar glo van agter gegryp. Toe sy bykom, was die man bo-op haar besig met omgang. Die ander meisie is intussen glo deur die ander man gegryp en ook verkrag. Laat die aand het die senior instrukteur glo by die huis opgedaag en toe hy sien in watter toestand die meisies was hulle teruggeneem basis toe.
“Ek wil weet hoekom die kinders in opdrag die basis moes verlaat om verkrag te word. Ek wil weet hoekom daar nie onmiddellik teen die mans opgetree is nie,” het die ontstoke familielid gesê.
Volg Nuus24 op Twitter.
- Die Burger