Oeps! Zuma nie tuis vir dié besoek
2011-10-30 08:00
Pretoria - ’n Diplomatieke oorlog in die kleine woed tussen Suid-Afrika en Oostenryk nadat ’n administratiewe flater in Zuma se kantoor die eerste staatsbesoek van ’n Oostenrykse staatshoof aan Suider-Afrika gekelder het.
Pres. Heinz Fischer van Oostenryk en ’n rits afgevaardigdes het maande lank beplan aan die besoek aan Suid-Afrika en Zuma.
Die agenda vir Woensdag se ontmoeting was al opgestel en die Oostenrykse ambassade het breedvoerige planne gemaak.
Verskeie ooreenkomste tussen dié lande sou bespreek word.
Waar Oostenryk se nasionale dag tradisioneel op 26 Oktober gevier word, is dit verskuif na dié week sodat dit saamval met die staatsbesoek waar Fischer sy land se burgers wat hier woon, kon ontmoet.
Maar dié feestelikhede het in ’n diplomatieke verleentheid vir Suid-Afrika ontaard toe Zuma se kantoor besef het hy moet eintlik in Frankryk wees vir die G20-beraad.
Die datum vir die G20-beraad is al maande lank bekend.
Rapport verneem op goeie gesag die Oostenrykse afvaardiging was woedend oor die hantering van hul staatsbesoek en het summier ál die planne gekanselleer.
Dr. Otto Ditz, Oostenryk se ambassadeur in Suid-Afrika, was aansienlik meer diplomaties toe Rapport hom genader het om kommentaar.
“Ons moet aanvaar dat dit weens ’n skeduleringsprobleem was. Ons is natuurlik teleurgesteld.”
Die ambassade se feesvieringe gaan voort op die nuwe datum, maar nie een van die Oostenrykse afgevaardigdes sien meer hul weg oop om Suid-Afrika toe te kom nie.
Die presidensie het navrae na die departement van internasionale betrekkinge verwys.
Clayson Monyela, dié departement se woordvoerder, het gesê as daar ’n dubbelbespreking was, “was dit maar net dit”.
– Volg Nuus24 op Twitter
- Rapport