'Geringe vertragings' ná vliegtuig brand
2012-11-13 08:56
Kaapstad – 'n Woordvoerder van die Lughawensmaatskappy van Suid-Afrika (Acsa) het Dinsdagoggend bevestig dat geen passassiers beseer is toe 'n vliegtuig se band op die aanloopbaan van die OR Tambo Internasionale Lughawe ontplof het nie.
Die vliegtuig, wat op pad was na Lilongwe, Malawi, het 120 passasiers en sewe bemanningslede aan boord gehad. 'n Brand het ontstaan ná die band ontplof het, maar dit is vinnig geblus.
"Ek kan definitief bevestig dat daar geen beserings was nie. Al die passassiers het die vliegtuig verlaat," het Unathi Batyashe-Fillis, 'n woordvoerder vir Acsa, Dinsdagoggend gesê.
"Ons het twee aanloopbane en een van hulle werk tans.
Sy het gesê vlugte is nie erg vertraag nie.
"Op die oomblik het ons geringe vertragings op vlugte wat vertrek. Maar dis glad nie lank nie."
Batyashe-Fillis het ook verduidelik dat dit 'n passasiersvliegtuig was wat in die voorval beskadig is, en nie 'n vragvliegtuig soos vroeër deur mediabronne berig is nie.
– Volg Nuus24 op Twitter.
