OKD sal inhegtenisneming van joernaliste ondersoek
2011-01-04 20:14
Kaapstad – Die Onafhanklike Klagtedirektoraat (OKD) sal die onlangse inhegtenisneming van twee joernaliste van Sowetan ondersoek, het die DA Dinsdag gesê.
Volgens LP Dianne Kohler-Barnard het Francois Beukman, uitvoerende hoof van die OKD, die ondersoek in ‘n brief bevestig.
Luidens die brief sal die saak die nodige aandag kry.
Penwell Dlamini en Antonio Muchave is op 29 Desember deur Hillbrow-polisie in hegtenis geneem. Hul toerusting is ook gekonfiskeer.
Hulle is in aanhouding geplaas terwyl hulle ‘n storie in die Johannesburgse middestad gedek het. Die storie het gehandel oor nege families wat uit die Regal Court-woonstelle gesit is.
Daar is beslag gelê op hul kameras en selfone sonder bewyse dat hulle met die polisie se werk ingemeng het, het Kohler-Barnard gesê.
Die joernaliste is ongeveer ‘n uur lank by die Hillbrow-polisiestasie aangehou.
Volgens Kohler-Barnard lyk dit asof hierdie stappe onwettig was.
Volg Nuus24 op Twitter.
- SAPA