OD gee toestemming aan lede vir veelvuldige lidmaatskap
2010-05-25 09:40
Kaapstad - OD-lede kan nou by die DA aansluit nadat die party se nasionale uitvoerende komitee (NUK) gister die groen lig vir veelvuldige lidmaatskap gegee het.
Nuwe wysigings aan die OD se grondwet, wat gister goedgekeur is, laat lede toe om by enige ander party aan te sluit of dit te ondersteun mits hy of sy toestemming van die NUK verkry.
Aansoek moet gedoen word by wyse van ’n spesiale vorm, soos voorgeskryf deur die party se sekretaris-generaal.
Die Burger het vroeër vandeesmaand eksklusief berig die OD-leier, me. Patricia de Lille, gaan einde Julie by die DA se kongres in Kaapstad as nasionale voorsitter van dié party benoem word. Die huidige bekleër van die pos, mnr. Joe Seremane, tree vanjaar as LP uit die politiek.
Die OD se NUK het gister op een van sy drie jaarlikse vergaderings in Johannesburg die wysigings goedgekeur. Luidens ’n verklaring is die doel daarvan om lede toe te laat om in sekere omstandighede by een of meer politieke partye aan te sluit.
Die NUK kan sodanige aansoek goedkeur as hy oortuig is dit is in belang van die party.
Voorbereiding vir volgende jaar se verkiesing is ook bespreek. De Lille gaan al die provinsies tussen 14 Junie en 16 Julie besoek om met die party se strukture te vergader.
Die komitee het ook sy onderhandelingspan se mandaat verleng vir gesprekke met ander partye om ooreenkomste te bereik.
Een van die OD se vier LP’s, mnr. Lance Greyling, het vroeër aan Die Burger bevestig dat hy hom ideologies nie met die DA kan vereenselwig nie. Dié party het ’n liberale politieke opvatting, terwyl die OD sosiaal-demokraties is
Die Burger
- Die Burger