OB wil polisieminister ondersoek – AfriForum

2013-02-25 16:46

Kaapstad – Die openbare beskermer het in ‘n skrywe aan AfriForum bevestig dat sy ‘n ondersoek teen die minister van polisie oorweeg, lui ‘n verklaring.

Die burgerregte-organisasie het in ‘n mediaverklaring gesê adv. Thuli Madonsela oorweeg ‘n ondersoek oor “magsmisbruik en politieke afpersing” teen Nathi Mthethwa.

AfriForum sê die skrywe spruit uit ‘n klag wat die groep verlede maand teen die minister ingedien het oor sy hantering van dié organisasie se protesoptog teen plaasmoorde, wat aan die einde van verlede jaar plaasgevind het.

“Die minister het die genoemde optog tot ‘n onwettige optog verklaar, ten spyte van die feit dat aan alle statutêre vereistes voldoen is,” lui die verklaring.

AfriForum het destyds ‘n dringende aansoek by Pretoria se hooggeregshof ingedien en ‘n verklarende bevel ontvang dat die optog mag voortgaan.

“Die minister het hom egter nie aan die hofbevel gesteur nie en voortgegaan om dit as ‘n onwettige optog te hanteer,” het Ernst Roets, adjunk- uitvoerende hoof van AfriForum, gesê.

Roets meen geen polisie is ontbied om na die veiligheid van die betogers om te sien nie. Hy sê die polisiebeamptes wat wel op die toneel was, was toevallig in die gebied en het geen kennis van die optog gedra nie.

Volg Nuus24 op Twitter  

- Nuus24