OB weer beskuldig dat sy inmeng in snoerwet
2011-12-16 10:30
Johannesburg – Adv. Thuli Madonsela, openbare beskermer (OB), is Donderdag opnuut daarvan beskuldig dat sy inmeng in die parlement se werk ten opsigte van die Wetsontwerp op die Beskerming van Staatsinligting.
Sy het Donderdag met dr. Mathole Motshekga, ANC-hoofsweep, in Johannesburg vergader nadat hy haar verlede week van inmenging beskuldig het omdat sy haar kommer oor die wetsontwerp in ’n brief aan die Nasionale Vergadering uitgespreek het.
Madonsela het vroeër die week met die Suid-Afrikaanse Nasionale Redakteursforum (Sanef) oor die wetsontwerp vergader.
Die Nasionale Raad van Provinsies (NRP) se ad hoc-komitee oor die wetsontwerp het in ’n verklaring gesê hulle neem met “kommer en ontevredenheid” kennis van die vergaderings.
“Ons wil dit op rekord stel dat dié samesprekings buite die parlementêre prosesse en spesifiek die ad hoc-komitee baie gevaarlike wanindrukke wek. Dit skep verkeerdelik die indruk dat bepaalde burgerregtegroeperings, individue en entiteite van die regering ’n groter speelveld het om hul standpunte buite die bepaalde parlementêre prosesse uit te druk,” het Raseriti Tau, ANC-LP en voorsitter van die komitee, in die verklaring gesê.
Terwyl die komitee die belangrike rol van die OB erken, moet die geloofwaardigheid van interne prosesse en die grondwetlike rol van die parlement nie in twyfel getrek word nie, het Tau gesê.
“Daarom is die parallelle ontmoetings ... minagtend van die wetgewende gesag of parlement, en spesifiek die NRP ... ”
Burgerregtegroepe en entiteite van die regering wat ’n belang het in die wetsontwerp moet voorleggings by die ad hoc-komitee indien wanneer die geleentheid kom, het Tau gesê.
Kgalalelo Masibi, Madonsela se woordvoerder, het ontken die vergadering ondermyn parlementêre prosesse.
“Die OB het vir die vergadering gevra nadat ons mediaberigte gesien het oor wat Motshekga gesê het.
“Die fokus van vandag se vergadering was net om uitsluitsel te kry oor sy kommentaar. Daar was geen gesprekvoering oor die wetsontwerp nie.”
Motshekga en sy parlementêre afvaardiging het ook Donderdag in Johannesburg met Cosatu vergader.
Cosatu het ’n dokument van 20 bladsye aan die afvaardiging voorgelê waarin hy sy standpunt oor die wetsontwerp verwoord. Albei partye het ingestem tot verdere samesprekings oor die kwessie.
– Volg Nuus24 op Twitter
- Beeld