Nuwejaarsvieringe in Kaapstad ruk handuit
2011-01-03 07:46
Die Burger
Kaapstad – Nuwejaarsvieringe in Langstraat het erg handuit geruk toe strate nie afgesper is nie en partytjiegangers selfs bo-op voertuie wat deur die mensemassa probeer beur het, gespring het.
Tot 12 mense het op ’n slag op een voertuig gespring. Motordakke is ingeduik en in een geval het ’n motor se voorruit gekraak.
Hoewel polisiebeamptes sowat ’n blok verder aan diens was, is nie veel gedoen om dié rampokkery stop te sit nie.
Die chaos het Saterdagoggend kort na middernag in die Moederstad ontstaan toe die besige Langstraat eenvoudig nie genoeg plek vir voetgangers en motoriste gehad het nie.
Sporadiesestruwelinge tussen voetgangers en motoriste het tot so laat as 04:00 op Nuwejaarsdaguitgebreek.
Klubeienaars met wie Die Burger gesels het, was erg ontevrede omdat hulle vroeër gevra het Langstraat moes op Oujaarsaand afgesper word, juis omdat soveel duisende mense daarheen sou stroom. Dié versoeke het op dowe ore geval.
Intussen het partytjiegangers glo openlik uit hul motors se bagasiebakke drank geskink. ’n Klubeienaar het na dié drinkery verwys en gesê as die paaie behoorlik afgesper was, sou die pret baie ordeliker verloop het.
Paramedici moes tydens die deurmekaarspul twee mans vir snywonde behandel.
In een geval het polisielede blykbaar kwaai handgemeen geraak met ’n man toe hulle hom van ’n motor afgetrek het. Die man is na bewering geskop terwyl hy op die sypaadjie gelê het.
By navraag oor die polisie se optrede in die middestad en Langstraat het kapt. Ezra October, polisiewoordvoerder vir Kaapstad-Sentraal, gesê die enigste ernstige voorval was toe ’n man in Laer Loopstraat om middernag skote afgevuur het, berig Marelize Barnard.
Polisielede het die man dadelik aangekeer. Hy het die nag in die polisieselle deurgebring en verskyn waarskynlik vandag in die landdroshof.
October het gesê die maksimum getal polisielede was aan diens en en het hulle toegespits op die nagkore en Kaapse Klopse wat deur die middestad beweeg het. Geen voorvalle is aangemeld nie.
Nowellen Petersen, woordvoerder van die metropolisie, het gesê Vrydagaand tussen 22:00 en 04:00 op Nuwejaarsoggend is 40 metropolisielede in die middestad ontplooi.
Dié lede het hulle ook op die nagkore se roete toegespits. Petersen het gesê geen voorvalle in Langstraat is by die metropolisie aangemeld nie.
Kylie Hatton, woordvoerder van die Kaapse stadsraad, het gesê daar is nie net op Langstraat gefokus nie. ’n Verskeidenheid gebeure het reg oor die stad plaasgevind waar die metropolisie aan diens was.
Hatton het gesê die besluit om ’n straat af te sper word versigtig gedoen, sodat noodvoertuie en verkeersvloei nie té erg ontwrig word nie.
Volg Nuus24 op Twitter.
- Die Burger