Nuwe tolfooi ‘nie laer’
2012-10-27 07:43
Johannesburg - Moedeloos, teleurgesteld, gefrustreerd en kwaad.
Dit
is van die woorde wat kritici van die Gautengse e-tolstelsel Vrydag gebruik het nadat “nuwe” tariewe in die Staatskoerant gepubliseer is.
Luidens
Vrydag se Staatskoerant sal motoriste met e-skyfies steeds 30c/km
betaal, terwyl dié sonder e-skyfies 58c/km sal betaal. As jy egter nie
betyds jou 58c betaal nie, kan dit opskuif na R1,74/km.
Ben
Martins, minister van vervoer, het Vrydag op ’n mediakonferensie in
Pretoria gesê ná konsultasie met rolspelers het die regering “laer
tariewe, ’n perk per maand vir alle kategorieë voertuie, afslag vir
voertuie met e-skyfies, afslag vir spesifieke tye van die dag en
vrystellings vir openbare vervoer” aangekondig.
Openbare voertuie
is steeds kwytgeskeld van tolgeld en geregistreerde gebruikers in ligte
motors en op motorfietse sal nooit meer as R550 per maand betaal nie.
Maksimum bedrae vir swaar voertuie is ook bygevoeg.
In die
begroting in Februarie vanjaar en in die Staatskoerant op 13 April was
die standaardtarief ook 58c per kilometer en die afslagtarief vir mense
met e-skyfies 30c per kilometer.
Dit het dus geensins verander nie.
Volgens
Alex van Niekerk, projekbestuurder van die Suid-Afrikaanse Nasionale
Padagentskap (Sanral), is die tariewe sedert verlede jaar byna met die
helfte verminder “om e-tol bekostigbaar te maak”.
In 2011 was die standaardtarief 66c/km teenoor 49,5c/km met ’n e-skyfie.
Howard Dembovsky, voorsitter van Justice Project South Africa, is “geskok dat die minister sê dié is laer tariewe”.
“Dit is presies dieselfde tarief en maksimumperk per maand (R550) wat in Februarie en April bekend gemaak is.”
Wayne
Duvenage, voorsitter van die Bondgenootskap Teen Stedelike Tol (Outa),
het gesê hoewel die regering nou die opvatting probeer skep dat die
tariewe laer is, is dit niks anders as dieselfde tariewe wat vroeër
vanjaar gepubliseer is nie.
Paul Pauwen, bestuurder van die
Suider-Afrikaanse voertuighuur-en-verhuringsvereniging (Savrala), het
gesê dit is “frustrerend, veral omdat voorstelle oor ander tariewe en
metodes van betaling nou maande lank met die interministeriële komitee
bespreek is, en nou gaan die regering eenvoudig net terug na die
oorspronklike plan”.
Zwelinzima Vavi, hoofsekretaris van die vakverbond Cosatu, het getwiet dat mense nie e-skyfies moet koop nie.
Hy het gesê die 30 dae vir openbare kommentaar “is ’n klug”.
“Dit gaan niks verander nie, selfs al maak 4 miljoen motoriste beswaar.”
Martins het gesê die samesprekings met die publiek in dié 30 dae is nie “ ’n klug nie.”
“Dit
is ’n proses waarin ons hoop Suid-Afrika se burgers sal hul voorstelle
indien en ons sal dit opreg oorweeg. Dié tariewe is nie die finale
tariewe nie.”
’n Rit kan soveel kos
’n Motoris in
’n ligte motor met ’n e-skyfie wat van Atterburyweg in Pretoria op die
N1 ry tot by die Malibongwe-afrit in Johannesburg sal betaal: (Bereken
met behulp van Sanral se e-tolrekenaar op sy webwerf.)
Op ’n weekdag in spitstyd: R14,62
Op dieselfde dag buite spitstyd, soggens: R13,21
Op dieselfde dag buite spitstyd, saans: R11,79
Op ’n Sondag of openbare vakansiedag: R7,56
Voor Kersfees?
Uit tye wat Vrydag bekend gemaak is, lyk dit of e-tol op Oukersdag ingestel gaan word.
George
Mahlalela, direkteur-generaal van vervoer, het gesê: “Die publiek het
van vandag 30 dae (dus tot 26 November) tyd om hul kom-mentaar oor die
nuwe tariewe en regulasies te rig.
“Daarna gaan die minister 14
dae gebruik om die kommentaar deur te gaan, waar-na die finale tariewe
onge-veer 14 dae later weer in die Staatskoerant gepubliseer sal word.”
- Beeld
