Nuwe polisiehoof gereed vir pos
2011-10-25 14:33
Johannesburg – Suid-Afrika se waarnemende nuwe polisiehoof, genl.maj. Nhlanhla Sibusiso Mkhwanazi, sê hy is gereed om sy nuwe rol aan te pak.
“Ek sien uit daarna om hierdie hele organisasie met ywer te bestuur – natuurlik met die bystand van my kollegas asook die hele bestuur van die Suid-Afrikaanse Polisiediens,” het hy in ‘n verklaring gesê.
Mkhwanazi (38) het in 1993 by die polisie aangesluit en aanvanklik in openbare-orde-polisiëring gewerk. Hy is later na die spesiale taakmag en sedert 2005 is hy die hoof daarvan.
Sy aanstelling kom nadat pres. Jacob Zuma die nasionale polisiekommissaris, genl. Bheki Cele, geskors het.
Die stappe teen Cele kom nadat Thuli Madonsela, openbare beskermer (OB), bevind het dat Cele onregmatig en onwettig opgetree het in verband met twee huurooreenkomste vir polisiekantore in Pretoria en Durban.
’n Raad van ondersoek onder leiding van oudregter Yvonne Mokgoro, wat in 2009 as regter van die konstitusionele hof uitgetree het, sal die aantygings teen hom ondersoek.
Mokgoro sal bygestaan word deur advokate Terry Motau SC en Anthea Platt.
Volg Nuus24 op Twitter
- SAPA