Nuwe petrolskok kom
2011-03-30 07:02
Kaapstad - Net toe Suid-Afrikaanse verbruikers begin dink het dit is tyd om die kop op te lig, is ’n lelike dwarsklap deur die gesig op pad met ’n volgende styging in die brandstofprys.
Die petrolprys kan op 7 April met sowat 30c styg en die dieselpryse met sowat 45c, terwyl die nuwe brandstofheffing van 10c en ’n Padongelukfondsheffing van 8c ook gedurende dié maand in werking tree.
Die nuwe hoër prys van petrol, diesel en paraffien beteken dat Suid-Afrikaners R1miljard per maand meer aan brandstof gaan bestee.
En ongelukkig is dit huishoudings wat R340miljoen van dié verhoogde uitgawe sal moet opdok.
Dit is nie ál slegte nuus vir die verbruiker nie.
“’n Volle 50% van dié bykomende R1miljard word deur besighede gedra. Maar onthou: die hoër pryse het maar die manier om tot in die beursies van verbruikers terug te kruip.”
Dié geldelike veldslag vir Suid-Afrikaners is deur mnr. Tony Twine, ekonoom by Econometrix, uitgespel. “Alles hang maar af van die prys van ruolie. Terwyl daar politieke onrus in kleiner produserende lande heers, word ons met die hoër prys van ruolie gestraf.”
Twine het gewaarsku indien politieke onrus uitbreek in een van die groot olieproduserende lande, soos Saoedi-Arabië of Iran, wag daar nog hoër brandstofpryse.
“Dit kan die oliepryse tot wie weet waar die hoogte laat inskiet.”
Mnr. Michael Bagraim, voorsitter van die Kaapse Sakekamer, het gesê in ’n tyd waarin pres. Jacob Zuma meer werksgeleenthede bepleit, sal klein sakeondernemings in der waarheid werkers moet afdank.
“Die petrolprys is net een aspek van die storm wat ondernemings moet oorleef. Daar is terselfdertyd ook verhoogde elektrisiteitspryse op pad, die internasionale ekonomie is steeds onder druk, en dit is byna weer tyd om oor salarisse te onderhandel,” het hy gesê.
’n Toenemend gemeganiseerde landbousektor sal ook swaar dra aan hoër petrol- en dieselpryse, het mnr. Carl Opperman, hoof van Agri Wes-Kaap, gister gewaarsku.
“Graanboere maak nou reg om te plant, wat ’n baie diesel-intensiewe proses is.
“Wat druiwe- en ander vrugteboere betref, loop die oesseisoen nou tot ’n einde, maar die produkte moet tog vervoer word. Melkboere moet ook daagliks suiwel met vragmotors vervoer.”
Opperman het gesê boere word regstreeks geraak deur die verhoogde brandstofpryse en kan nie sommer die kostes na die verbruiker aangee nie.
Petrolpryse sal ook die pryse van vliegkaartjies en ander vervoerkoste vir reisigers opjaag.
Me. Mariette du Toit-Helmbold, hoof van Kaapstad Toerisme, het daarop gewys dat veral besighede sensitief is vir reiskostes. “Selfs effens duurder vliegtuigkaartjies beteken kleiner maatskappye moet hul reiskoste inperk.”
- Volg Nuus24 op Twitter.
- Die Burger