Nuwe ondersoekspan begin met Oscar-saak

2013-02-25 14:34

Johannesburg – Die speurder wat in die Oscar Pistorius-moordsaak aangestel is, het in alle erns met sy ondersoek begin en bronne sê dié werk behoort oor 'n maand afgehandel te wees, berig Eyewitness News.

Pistorius word daarvan beskuldig dat hy sy vriendin, Reeva Steenkamp, op Valentynsdag in sy huis in die ooste van Pretoria doodgeskiet het.

Ao. Hilton Botha, voormalige hoof-ondersoekbeampte, is Donderdag vervang nadat dit aan die lig gekom het dat hy deur aanklagte van poging tot moord in die gesig gestaar word.

Lt. genl. Vinesh Moonoo is in sy plek aangestel en het 'n span van nuwe ondersoekbeamptes saamgestel.

Volgens die radiostasie sal die Gautengse speurder Mike van Aardt sy ondersoek Maandag in alle erns begin.

Verskeie ander beamptes sal hom bystaan en Van Aardt sal aan Moonoo, Suid-Afrika se top-speurder, rapporteer.

Van Aardt sal kyk na selfoonrekords en verklarings wat by getuies afgeneem is, terwyl hy wag vir forensiese bewyse om gefinaliseer te word.

Polisiebronne het gesê 'n maand behoort genoeg tyd te wees om die nodige inligting in te samel.

– Lees meer hier

– Volg Nuus24 op Twitter