Nuwe middestad vir Pta
2011-02-21 14:30
Pretoria - Die Tshwane-metromunisipaliteit het sy planne vir ’n multimiljardrand-projek waarmee hy in samewerking
met die nasionale departement van openbare werke die hoofstad se kern wil
“herdefinieer”, onthul.
Oupa Nkoane, Tshwane se waarnemende munisipale bestuurder, het
in ’n eksklusiewe onderhoud aan Beeld gesê sowat 30 hyskrane gaan in die
Pretoriase middestad doenig wees wanneer dié
omvattende stedelike bestuursplan in werking gestel word.
Die “herbeplanning” van die middestad
begin onmiddellik en die eerste staatsgeboue sal na verwagting teen einde 2014
voltooi word.
Tshwane en openbare werke het ’n diensleweringsooreenkoms
onderteken en die internasionale ingenieurs- en konsultasiegroep Arup is
aangestel om die projek te koördineer en die vernuwingsplanne op te stel.
Nkoane sê as Tshwane werklik daarop wil aanspraak maak dat hy
Afrika se hoofstad van uitnemendheid is, moet dit weerspieël word.
In hoofstede wêreldwyd is dit die tendens dat plaaslike owerhede
met die nasionale regering saamwerk om stede te ontwikkel, sê hy.
“Hier was dit nog nooit die geval nie, maar met die regering se
steun sal ons nou ’n ikoniese, unieke Afrika-hoofstad kan herbou.”
Bernard Hanekom, direkteur van stadsbeplanning en ekonomiese
ontwikkeling in Tshwane se sentrale streek, sê die nasionale regering het al in
2003 die behoefte uitgespreek om die werkomgewing van departemente en
staatsdepartemente te verbeter.
Hanekom sê die projek gaan oor meer as net die herlewing van die
middestad. Kwessies soos die bestuur van informele
handelaars, polisiëring, vullisverwydering, die herstel van “swak geboue”, die
vervoernetwerk en die doeltreffende toepassing van munisipale regulasies sal ook
aandag kry.
Die middestad is in agt “wyke”
ingedeel wat volgens Nkoane in die fynste detail herontwikkel gaan word.
Een van die geboue wat eersdaags ’n nuwe baadjie gaan kry, is die munisipale hoofkantoor,
Munitoria.
- Beeld