Nuwe boere verbeur só miljoene
2009-12-21 08:48
Liesl Peyper
Kaapstad – Nagenoeg R10 miljoen van ’n landboufonds vir geldelike hulp aan opkomende boere is aan konsultante betaal vir projekte wat nie werklik nodig was nie.
Tina Joemat-Pettersson, minister van landbou, bosbou en visserye, het in ’n antwoord op ’n parlementêre vraag van Piet Pretorius, DA-woordvoerder oor landbou, gesê R9,3 miljoen is uit die Landbank se omstrede landboubemagtigingsfonds vir projekte gebruik.
Dit sluit in die ontwikkeling van ’n databasis vir opkomende boere (R3 miljoen), ’n assessering van die voerkraal-bedryf (R3,5 miljoen) en ’n “vooruitskouing” van die landboubedryf (R2,8 miljoen).
Volgens Pettersson het ’n komitee van die fonds toestemming vir die projekte gegee, maar die fonds én die komitee is aan ’n forensiese ondersoek onderworpe.
Pretorius het gesê nie een van die projekte was werklik nodig nie omdat die departement reeds oor al die inligting beskik. “Dit is maar net weer geld wat aan pelle betaal is.”
Die landboufonds was sowat twee maande gelede ook in die nuus toe die Sunday Times berig het dat belanghebbendes onregmatig geld van die fonds gebruik het om duur eiendom en motors aan te skaf.
Pretorius het gesê die ondersoek sloer reeds onnodig lank.
- Beeld