Nuwe bewerings van korrupsie teen SOE-hoof
2011-07-17 16:00
Kaapstad – Nuwe bewerings van korrupsie word teen Willie Hofmeyr, hoof van die spesiale ondersoekeenheid (SOE), en sy kollegas gemaak, berig die Sunday Times.
Volgens die koerant het adv. Menzi Simelane, hoof van openbare vervolging, bewerings van bedrog wat deur die miljardêr Dave King teen Hofmeyr gemaak is, na die polisie verwys.
Simelane het ook beveel dat 'n ondersoek teen Knorx Molelle, hoof van die batebeslagleggingseenheid in KwaZulu-Natal, gedoen word. Molelle is deel van die span wat die Inkata-saak ondersoek.
Bewerings van bedrog en korrupsie word teen twee senior ANC-lede ondersoek nadat hulle glo omkoopgeld van die Paraguayse sakeman Gaston Savoi geëis het in ruil vir 'n regeringstender ter waarde van R45 miljoen.
Staatsaanklaers vrees dat die ondersoek politici in KwaZulu-Natal vererger het en dat die NVG se reaksie dalk deel is van Simelane se komplot teen Hofmeyr en die batebeslagleggingseenheid.
Die King-bewerings volg kort op die hakke van 'n ondersoek teen Hofmeyr wat verband hou met die beweerde wanbesteding van geld by die SOE en die beweerde verontagsaming van aankoopprosedures in die toekenning van ’n tender vir die opknapping van die eenheid se kantore in Silverton, Pretoria.
Die SOE is betrokke in talle ondersoeke, waaronder 'n ondersoek na verskaffingsprosedures in die polisie.
Hofmeyr het in Maart aan LP's gesê die SOE ondersoek 16 departemente en openbare entiteite vir bedrog en wanadministrasie.
Hy het saam met adv. Thuli Madonsela, Openbare Beskermer, gewerk aan die ondersoek na die multi-miljardrand huurooreenkoms van die polisiehoofkwartiere in Pretoria.
– Volg Nuus24 op Twitter
- SAPA