Nuwe, beter vigsplan begin in Gauteng
2010-04-01 00:49
Johannesburg - Nuwe riglyne vir MIV/vigs-behandeling sal van Donderdag af by alle staatshospitale en -klinieke in Gauteng beskikbaar wees, het die provinsiale departement van gesondheid en maatskaplike ontwikkeling gesê.
"Die nuwe riglyne verseker dat alle swangervroue wat MIV-positief is en pasiente op TB-behandeling met 'n CD4-telling van 350 of laer nou antiretrovirale middels by staatsklinieke en -hospitale kry," het Mandla Sidu, 'n woordvoerder van die departement van gesondheid, Woensdag in 'n verklaring gesê.
Hy het gesê babas van geboorte tot een jaar wat MIV-positief is sal ongeag van hul CD4-telling antiretrovirale behandeling ontvang.
Voorheen kon slegs mense wat MIV-positief is en wie se CD4-telling laer as 200 is, in aanmerking kom vir dié behandeling by staatsinstansies.
Sidu het gesê swangervroue wat MIV-positief is met 'n CD4-telling hoër as 350 sal nou op 14 weke in plaas van 28 weke Neverapine ontvang om ma-tot-kind-oordrag te verminder.
"Dit sal bydra om te verseker dat babas nie met MIV gebore word nie."
Die nuwe riglyne verseker ook dat vroue met 'n hoër CD4-telling ook in aanmerking kom vir 'n jaarlikse papsmeer.
Die slagoffers van verkragting sal aanhou post-blootstellingsprofilakse (PEP) sonder 'n saaknommer kry.
Sidu het gesê diegene wat nie in die bogenoemde kategorieë val nie, sal steeds in aanmerking kom vir behandeling as hul CD4-telling 200 of laer is.
"Dié program is daarop gemik om die MIV/vigssterftesyfer te verminder."
– Sapa