Nuus oor Oscar maak internasionaal opslae

2013-02-14 11:31

Kaapstad – Die nuus dat die paralimpiese atleet Oscar Pistorius sy meisie na bewering doodgeskiet het toe hy haar as ‘n inbreker aangesien het, het Donderdag internasionaal opslae gemaak.

Mediabronne oor die wêreld heen het oor die gebeure berig ná dit vroegoggend aan die lig gekom het.

Die Britse nuusnetwerk Sky News het met die Suid-Afrikaanse joernalis Kalay Maistry 'n onderhoud gevoer. Sy het beweer Pistorius se vriendin het hom probeer verras vir Valentynsdag, hoewel dié bewering nie deur enige ander bronne gestaaf is nie.

Sky het berig dat paramedici tussen 04:00 en 05:00 na Oscar se huis ontbied is.



Die skietery was ook hoofnuus op CNN. 'n Span van dié netwerk het glo op die toneel opgedaag terwyl 'n voertuig met die slagoffer in die toneel verlaat het. CNN het onder andere na Suid-Afrika se hoë misdaadsyfer verwys. 




Die nuus was laatoggend die BBC se hoofstorie. Dié uitsaaier het Pistorius se vele prestasies opgenoem, en ook verwys na Suid-Afrika se misdaadsyfer.



Die bekende internetnuusblad Hufington Post het die storie op sy tuisblad gepubliseer, en verskeie mediabronne aangehaal. Verskeie fotogalerye van Pistorius se prestasies is op die blad vertoon. Lesers het in die kommentaarruimte bespiegel oor die regsimplikasies wat die voorval inhou.




– volg Nuus24 op Twitter