Cruywagen: ‘Ek oefen al 35 jaar!’
2010-11-26 10:45
Beeld
Johannesburg - Die Afrikaanse nuuslegende Riaan Cruywagen vier vandag 45 jaar in die uitsaaiwese – 35 daarvan as TV-nuusleser.
Die 65-jarige Cruywagen het al meer as 6 000 TV-nuusbulletins aangebied, het hy Donderdag vertel. “Ek oefen nou al 35 jaar om die TV-nuus te lees – die dag wanneer ek die kuns bemeester het, sal ek uittree,” het hy geskerts.
As deel van dié mylpaalviering lees hy vanoggend van die Engelse nuusbulletins op Highveld Stereo se Breakfastxpress-program. Darren Simpson, hoofankeraanbieder, het hom genooi om ’n gas te wees en “sommer ’n bietjie pret saam te maak”.
Cruywagen het in 1965 as eerstejaar in Stellenbosch deeltyds by die SAUK in Kaapstad begin uitsaai. Hy is op 1 Desember 1968, nadat hy sy graad gekry het, as omroeper by die destydse Afrikaanse Radiodiens in Johannesburg aangestel. Op 26 November 1975 het hy sy heel eerste TV-nuusbulletin aangebied.
“Dit was 20:00, in die tyd van TV-toetsuitsendings, toe die geskeduleerde aanbieder ter elfder ure verhinder is.
Die nuusredakteur was Fanus Venter en die ateljeeregisseur Danie Nortjé.”
“In dié uitsending het die soeklig onder meer geval op die jongste verwikkelinge aan die noordergrense van die land, die vonnis van Breyten Breytenbach tot nege jaar tronkstraf, die onsekere toestand in Portugal ná ’n mislukte staatsgreeppoging en sportgebeure.”
Een van Cruywagen se vele hoogtepunte was om die land op die hoogte te hou ná die Helderberg-ramp op 28 November 1986.
Hy het Suid-Afrikaners vertel van die destydse pres. FW de Klerk se rigtinggewende toespraak in die parlement toe dié aangekondig het oudpres. Nelson Mandela gaan vrygelaat word. “Toe het ek geweet Suid-Afrika gaan onherroeplik verander.”
Cruywagen het ook die publiek ingelig gehou oor die Waarheid-en-versoeningskommissie-uitsprake, die World Trade
Center-ramp in 2001 en prinses Diana se dood in 1997.
Hy beskou homself nie as ’n tipiese “celebrity” nie.
“Nuuslesers lewer ’n diens aan die publiek. Ek is net bly die mense is nog tevrede met wat hulle op TV sien van my!”
Simpson het gesê hy wou Cruywagen al lankal op sy program kry.
“Ons het net vir die regte verskoning gewag.”
Hy beskou Cruywagen as een van sy topvyf Suid-Afrikaners.
Volg Nuus24 op Twitter