Nou kan gestorwenes per e-pos bereik word
2011-03-06 09:03
Jou salige geliefdes is nou ook deur middel van e-pos bereikbaar.
Julia Theunissen, dogter van die bekende psigiese medium Marietta Theunissen en deesdae in eie reg ’n bedrywige medium, het pas aangekondig sy doen nou ook psigiese lesings per e-pos.
Theunissen sr. is al geruime tyd in Suid-Afrika bekend vir haar dodebeswering op programme soos Die ander kant, waar sy mense help om met hul afgestorwe geliefdes in aanraking te kom.
Haar dogter Julia, wat deur haar ma opgelei is, is al ’n paar jaar besig om ook vir haarself ’n naam as psigiese praktisyn op te bou.
Sy doen al ’n ruk lank telefoniese lesings, maar het nou aangekondig sy kan jou ook per e-pos inlig wat die toekoms vir jou inhou, wat jou psigiese energie behels en wat die dooies vir jou te sê het.
“Al my e-pos-lesings het ’n vaste vorm,” vertel Julia, “en deel van daardie vorm is ’n paragraaf waarin ek vir mense boodskappe van die ander kant gee.”
Een van die eerste persone wat van dié diens gebruik gemaak het, was ’n 26-jarige man met familieprobleme. “Hy het ’n boodskap van sy oorlede oupa gevra en ek het hom vertel daar is inderdaad so iemand aan die ander kant en dat dié oupa saam met hom is en hom sal ondersteun.” Die oupa het glo ook gehelp om ’n paar destruktiewe patrone in die familie uit te wys.
Dié e-pos-kommunikasie met die hiernamaals is nie heeltemal ongehoord nie, vertel Julia. Haar ma het al by geleentheid vir mense e-lesings gedoen. En die Theunissens bedryf al ’n ruk lank deel van hul bediening op die webtuiste www.otherworlds- tomorrow.com waar telefoniese lesings (R850 per halfuur vir Marietta, R350 per halfuur vir Julia) ook geadverteer word.
E-poslesings is ’n bietjie duurder. Julia vra R450, maar sy doen glo ’n volledige uitleg van sewe bladsye met die kliënt se psigiese profiel.
Psigiese bedrywighede oor die internet is niks nuuts nie, sê Martha van Eeden, ’n psigiese medium van Sasolburg en kleindogter van die gevierde Madame Rose, wat in die 1960’s Suid-Afrika se beroemdste fortuinverteller was.
“Ek doen self al lank lesings oor e-pos. Van my kliënte sit so ver as Saoedi-Arabië en Amerika.”
- Rapport