Noordwes steier onder korrupsie, bedrog

2012-10-23 08:34

Johannesburg – Onreëlmatighede in verband met aanstellings, verdagte transaksies met miljoene rande in openbare fondse en tjekbedrog is net 'n paar van die korrupte praktyke wat oopgevlek is in 'n spesiale ondersoek na die sake van verskeie munisipaliteite in die Noordwes.

Die Sowetan het Dinsdag berig dat 'n spesiale ondersoek oor die geldsake van 24 munisipaliteite in die Noordwes wydverspreide korrupsie in die provinsie blootgelê het.

By die Madibeng-munisipaliteit in Brits behoort 12 van die maatskappye wat gereeld met die stadsraad sake doen, aan munisipale amptenare, het die Sowetan berig.

Die ondersoek toon dat amptenare tussen Januarie 2005 en November 2009 sowat R4,9 miljoen uit dié bedrywighede verdien het.

By die Taung-munisipaliteit het die ondersoek getoon dat 135 munisipale werknemers onverklaarde finansiële belange in maatskappye buite die munisipaliteit het.

Dieselfde probleem herhaal hom by die Moses Kotane-munisipaliteit, waar 115 werknemers onverklaarde finansiële belange het.

In die Taung-munisipaliteit het minstens vier werknemers direkte voordeel getrek uit kontrakte wat dié maatskappye met die munisipaliteit gesluit het.

In die Moses Kotane-munisipaliteit is 17 werknemers van die stadsraad direkteure van maatskappye wat met die munisipaliteit sake doen.

Intussen het die Rustenburg-munisipaliteit sowat R24,3 miljoen aan belastinginkomste verloor omdat altesaam 19 144 eiendomme nie op dié munisipaliteit se bateregister verskyn nie.

Die Ramotshere-munisipaliteit word ook ondersoek oor tjekbedrog van R428 246.

– Lees hier meer.

– Volg Nuus24 op Twitter.