Noordwes-pastoor in hof ná beweerde verkragting

2013-02-13 12:42

Johannesburg – ‘n Pastoor het na bewering ‘n tienermeisie in Phokeng naby Rustenburg verkrag, het die polisie gesê.

Brig. Thulani Ngubane sê die 17-jarige meisie en haar vriende het die prediker saans gehelp om die kerkterrein skoon te maak.

Die 29-jarige pastoor het die meisie ‘n rygeleentheid skool toe aangebied.

“... Die jong meisie het die pastoor se aanbod aanvaar. Pleks daarvan om skool toe te ry, het die verdagte by nabygeleë bosse ingedraai, waar hy die slagoffer na bewering verkrag het.”

Ngubane sê inwoners het gesien hoe die voertuig met ‘n jong meisie in 'n skooluniform daarin, by die bosse ingedraai het. Die polisie is dadelik ontbied.

Polisiebeamptes het by die toneel opgedaag en gesien hoe die pastoor die meisie seksueel aanrand. Hy is in hegtenis geneem en van verkragting aangekla.

Hy sal binnekort in die Bafokeng-landdroshof in Tlhabane verskyn.

Thandi Modise, premier van die Noordwes, sê mense moet saam staan teen verkragting.

Sy sê beter maatreëls moet ook in plek gestel word om vroue en kinders teen seksuele oortreders te beskerm.

Die premier het in ‘n verklaring gesê dis nóg erger wanneer die beskuldigdes veronderstel was om slagoffers van seksuele oortredings berading te gee.

Volg Nuus24 op Twitter

- SAPA