Noord-Kaap: Onnies steeds geïntimideer
2012-10-05 18:05
Johannesburg – Onderwysers wat na 41 skole in die Noord-Kaap teruggekeer het wat weens diensleweringsbetogings gesluit was, word steeds geïntimideer, het die Nasionale Professionele Onderwysersorganisasie (Naptosa) Vrydag gesê.
Naptosa het sy kommer uitgespreek oor die intimidasie wat na bewering steeds by van dié skole plaasvind.
"Wat Naptosa bekommerd maak is die situasie waar skole steeds nie oop is nie, hoewel dit net 'n paar skole is; [en] die feit dat die lede van sommige vakbonde verhoed dat die skole heropen en Naptosa-onderwysers intimideer wat wil klas gee," het Louwrens Strydom, uitvoerende hoof van Naptosa in die Noord-Kaap, gesê.
Kinders in die provinsie het sedert Junie nie skoolgegaan nie weens diensleweringsbetogings in Olifantshoek, Kuruman en Kathu.
Leerders het teen die einde van September na klaskamers teruggekeer danksy ingryping van die openbare beskermer en ander amptenare.
"Baie van die leerders en onderwysers het geweld en intimidasie van 'n baie aggressiewe aard ondervind... as hulle nie [ondersteun word nie], is die les wat hierdie leerders sal leer dat geweld en intimidasie die manier is om probleme op te los," het hy gesê.
– Volg Nuus24 op Twitter.
- SAPA
