Nóg volstruis-uitdunning in Wes-Kaap
2011-05-24 20:00
Kaapstad - Nog volstruise op sewe plase in die Klein Karoo in die Wes-Kaap sal uitgedun word, nadat dié gebiede positief getoets het vir voëlgriep.
“Volstruise op dié plase sal uitgedun word deur middel van beheerde slagting in die abattoir,” het die Wes-Kaapse departement van Landbou Dinsdag gesê.
Die vel en vere sal geoes en verwerk word en die vleis sal kos vir troeteldiere word.
Dié skuif volg op ‘n onlangse uitbraak van voëlgriep in die provinsie. Die departement het verlede maand ‘n hoogs patogeniese voëlgriep in die Klein Karoo geïsoleer. Dit het gelei tot die onmiddellike staking van die uitvoer van volstruisvleis aan die Europese Unie (EU).
“Altesaam 10 000 volstruise is reeds op dié manier uitgedun tydens die huidige uitbraak. Die departement kan nie in hierdie stadium skat wat die totale getal sal wees nie, aangesien die uitbraak steeds aan die gang is,” het die departement in ‘n verklaring gesê.
- Volg Nuus24 op Twitter
- SAPA