Nóg twee vas ná Pta-rooftog
2011-09-16 10:01
Pretoria – Nóg twee mans is Vrydag in hegtenis geneem nadat hulle glo 'n winkel en drie polisiebeamptes in Menlynpark in Pretoria beroof het.
Dít bring die aantal mense wat in hegtenis geneem is, tot vyf, het lt.kol. Tshisikhawe Ndou gesê.
Die polisie het op drie 9 mm-pistole, waarvan die polisie beroof is, en 'n R5-geweer beslag gelê.
'n Groep mans het Donderdagmiddag 'n winkel in Atterburyweg van 'n onbekende bedrag geld beroof.
Drie polisiebeamptes het opgedaag terwyl die rooftog aan die gang was. Die rowers het toe die polisie van hul dienspistole beroof en gevlug.
Ndou het gesê nog polisiebeamptes het opgedaag en drie van die vermeende rowers oorrompel.
Die twee makkers van die vermeende rowers het toe in 'n taxi gevlug.
"Die taxi is ook gevind toe die twee in hegtenis geneem is," het Ndou gesê.
Die vyf mans staan tereg op aanklagte van sake- en gewapende roof.
– Volg Nuus24 op Twitter
- SAPA