Nog twee in hegtenis vir grusame moord
2011-12-04 21:58
Johannesburg – Twee mense, waarvan een ‘n polisiebeampte, is Sondag in Magatle, suid van Polokwane, in hegtenis geneem nadat hulle glo ‘n man vermoor en sy ledemate afgesny het, het die polisie in Limpopo gesê.
Matete Mphahlele (34) is Dinsdag deur vier mans en ‘n vrou doodgeslaan met pikstele, het lt. kol. Mohale Ramatseba gesê.
Die aanvallers het probeer om Mphahlele se lyk in ‘n puttoilet in Mathibela, naby Magatle, te gooi. Hulle het hom blykbaar daarvan verdink dat hy ‘n gewapende rooftog beplan het.
“Daar word vermoed dat die lyk nie in die puttoilet wou pas nie. Hulle het toe sy ledemate afgesny en sy lyk is toe só in die puttoilet gegooi,” het Ramatseba gesê.
Drie van die vermeende moordenaars is Vrydagaand in hegtenis geneem, nadat die dele van die lyk gevind is.
Die vyf mense, tussen die ouderdomme van 22 en 55, het ook na bewering Mphahlele se meisie ernstig aangerand voordat hy doodgemaak is.
Hulle sal na verwagting Maandag in die Mahwelereng-landdroshof verskyn.
- Volg Nuus24 op Twitter
- SAPA