Nóg skok-aantygings oor geboue
2011-07-01 07:14
Kaapstad. – Gwen Mahlangu-Nkabinde het kort ná haar aanstelling as minister van openbare werke ’n topamptenaar van haar departement basies gedwing om twee huurooreenkomste van R1,2 miljard met die sakeman Roux Shabangu te sluit.
Dié aantyging is vervat in adv. Thuli Madonsela, openbare beskermer (OB), se voorlopige verslag oor die ondersoek na die huurkontrak van die Transnet-gebou in Durban vir die polisie se hoofkantoor in KwaZulu-Natal.
Luidens die verslag het die departement van openbare werke (DOW) se interne ondersoeke na die huurkontrakte doodgeloop nadat pres. Jacob Zuma vir Geoff Doidge tydens ’n kabinetskommeling op 31 Oktober 2010 met Mahlangu-Nkabinde vervang het.
Mnr. Siviwe Dongwana, destydse direkteur-generaal van openbare werke (DOW), sê in verklarings aan die OB hy het albei huurkontrakte (in Durban en vir die Sanlam-Middestad-gebou in Pretoria) einde November 2010 teësinnig onderteken weens “volgehoue druk van die minister en Shabangu”.
“Dit het geblyk Shabangu het direk met die minister en haar raadgewers gekommunikeer,” lui die verslag.
Shabangu het na Mahlangu-Nkabinde as sy “ouer suster” verwys en SMS’e tussen hom en haar oor die huurkontrakte aan Dongwana gewys.
Luidens die voorlopige verslag het Mahlangu-Nkabinde in ’n onderhoud met die OB erken sy het sedert haar aanstelling as minister gereeld telefonies met Shabangu gepraat en hom ’n paar keer by haar kantoor en elders ontmoet.
Die minister was egter nie bereid om enige vrae oor die huurkontrak vir die Sanlam-Middestad-gebou in Pretoria te beantwoord nie. Sy het voorts ontken dat sy enigsins by die huurkontrak vir die Transnet-gebou in Durban betrokke was en het aangevoer Dongwana was daarvoor verantwoordelik.
Maar luidens die OB se verslag is daar geen rede om Dongwana se weergawe van die gebeure te betwyfel nie.
“Sy getuienis stem ooreen met die inligting wat van ander getuies bekom is, asook die dokumentasie wat tydens die ondersoek gebruik is.
“Sy verduideliking dat hy eindelik ingestem het om die huurkontrak vir die Transnet-gebou te onderteken weens druk van die minister en Shabangu blyk geloofwaardig te wees.”
Die OB sê voorts die feit dat Mahlangu-Nkabinde nie bereid was om die OB se vrae te beantwoord nie en haar “huiwering” om haar volle samewerking tydens die ondersoek te gee, “maak dit uiters moeilik om haar weergawe van gebeure” met dié van DOW-amptenare te vergelyk.
Dongwana is kort nadat hy die huurooreenkomste in November 2010 onderteken het, geskors “oor redes waarvan hy nie eens bewus is nie”, lui die verslag.
Sam Mkhwanazi, Mahlangu-Nkabinde se woordvoerder, het gesê die minister ontken die OB se aantyging dat sy nie haar volle samewerking tydens die ondersoek gegee het nie.
– Volg Nuus24 op Twitter
- Die Burger