Nóg renosterhorings gestroop
2012-01-12 08:51
Bloemfontein – Nog drie renosterkarkasse is na verneem word Woensdagoggend in die gebied in die Krugerwildtuin gevind waar agt karkasse kort vantevore gevind is.
SANParke wou die nuutste vonds nie Woensdag bevestig nie.
’n Noodvergadering oor die nuutste krisis is Woensdagmiddag in Skukuza gehou.
Rey Thakuli, woordvoerder van SANParke, het gesê die krisisvergadering van die nasionale gesamentlike operasiesentrum (Natjoints) is belê om planne te beraam om die slagting te bekamp nadat die agt karkasse binne 24 uur ontdek is.
SANParke, die polisie, weermag en ander veiligheidsgemeenskappe is by die vergadering betrek.
“Daar is reeds ’n teenstropingstrategie op die tafel, maar daar gaan nou saam met die lede van Natjoints gekyk word hoe die strategie versnel kan word.”
Meer inligting, mannekrag en hulpmiddels is volgens Thakuli dringend nodig om die strooptogte te stuit.
Intussen het Volksblad vasgestel daar is Dinsdag ook vyf renosterkarkasse in ’n private reservaat naby Stoffberg gekry.
Al die diere se horings is, net soos dié in die wildtuin, verwyder.
Die meeste van die 16 karkasse wat die afgelope 48 uur ontdek is, was baie vars.
“Die diere is nie langer as vyf dae gelede geskiet nie,” het ’n ingeligte met grondige kennis van renosterstropery gesê.
Intussen is veldwagters en soldate steeds op soek na die stropers van die Krugerwildtuin-renosters.
Die soektog na nog karkasse word gemik op die gebied tussen Pretoriuskop en Krokodilbrug aan die oostelike grens van die wildtuin.
“Ek is bevrees ons gaan nog etlike karkasse opspoor wat die afgelope week geskiet is,” het die ingeligte voorspel.
“Ons is ongelukkig besig om die stryd teen die stropers te verloor,” het hy gesê.
Volg Nuus24 op Twitter
- Volksblad