Nóg reën kom vir VS
2011-03-09 08:39
Bloemfontein - Dit reën steeds. En nóg reën word vir die deurnat Vrystaat voorspel.
Tussen 80mm en 100mm reën het die naweek in die Suid-Vrystaat geval.
Daarby word nóg reën van eerskomende Sondag vir die grootste deel van volgende week vir die streek voorspel.
Ná meer as 500 mm in distrikte soos Smithfield, Rouxville en Zastron, loop plaasdamme oor, spruite is weer in vloed en paaie is modderbane.
’n Plaasdam op die plaas Eensaamhoek, Smithfield, van Henry Gertenbach het die tweede keer dié seisoen gebreek.
Die damwal is ná die vloede in Februarie hier herstel, maar dit het die naweek weer ná swaar donderbuie gebreek.
Die Smithfield-dorpsdam, wat lank droog was, was Dinsdag propvol. Inwoners het verwag dit kan oorloop.
Harry Prinsloo, boer van Smithfield en vise-voorsitter van die Nasionale Wolkwekersvereniging (NWKV), sê tot 114 mm is die naweek hier gemeet. Dit is plek-plek “ongemaklik” nat.
Die veesiektes wat kop uitsteek, is ook baie erg. Skaapboere het veral skade met lammers van vyf of ses maande wat vrek. Haarwurm en bloutong is die grootste oorsaak van vrektes.
Volgens Prinsloo wil dit lyk of skape weerstand teen sekere haarwurmmiddels opbou.
Die uitbreking van bek-en-klouseer in KwaZulu-Natal net toe ’n afvaardiging Chinese in die land aangekom het om die veiligheid van Suid-Afrikaanse wol ná die uitbreking van slenkdalkoors verlede seisoen te ondersoek, is ook ’n slag.
Die Chinese het Dinsdag ’n plaas buite Cradock besoek om ’n skeerdery te besigtig en voer Vrydag in Pretoria samesprekings met Suid-Afrika.
Dié land se verbod op plaaslike wol oor slenkdalkoors geld steeds, terwyl ’n verbod weens bek-en-klouseer van 2002 tot 2006 gegeld het.
Ondanks dié terugslae gaan dit eintlik goed met die veebedryf, sê Prinsloo.
Die vleispryse en wolpryse is baie goed en die weiding is ná die reën baie goed.
Die Suid-Afrikaanse Weerdiens voorspel nog reën vir die volgende week. In sy vooruitskatting het hy bo-normale reënvaltoestande vir die somerreënvalgebiede tot minstens April voorspel.
Die regering van Queensland in Australië voorspel op sy webtuiste oor weernavorsing ’n kans van 60% tot 70% vir bogemiddelde reënval vir die randgebiede van die Vrystaat en die oostelike en noordelike strook van die Noord-Kaap en 50% tot 60% vir die sentrale dele van die Vrystaat.
- Volksblad