Nóg plaaswerkers wil staak

2012-11-13 08:18

Kaapstad – Die vakverbond Cosatu het gesê nóg plaaswerkers sal Dinsdag in solidariteit met plaaswerkers van De Doorns begin staak, berig RSG.

Die vakbonde het volgens die radiostasie oproepe van individuele plaaswerkers ontvang wat by die staking wil aansluit.

Boere en vakbonde het intussen egter gesê die plaaswerkers in De Doorns sal Dinsdag terugkeer werk toe.

Altesaam 13 mense is vroeër in hegtenis geneem nadat die polisie teen betogende plaaswerkers aksie geneem het.

Kol. André Traut, polisiewoordvoerder, het gesê geweld het in gebied uitgebreek toe sowat 80 mense met stokke en pangas, plaaswerkers geïntimideer het en hulle gekeer het om by die werk aan te meld.

Die mense sal Dinsdag op aanklagte van openbare geweld en intimidasie in die Worcester-landdroshof verskyn.

– RSG

– Volg Nuus24 op Twitter