Nóg 'n slag tref Oscar se familie
2013-02-24 07:50
Kaapstad – Oscar Pistorius se broer, Carl, sou verlede week op aanklag van strafbare manslag verhoor word, het die eNCA-nuuskanaal Sondag berig.
Die aanklag hou verband met 'n ongeluk in 2010 waarin 'n vroulike motorfietsryer gesterf het. Die ongeluk het in Vanderbijlpark plaasgevind.
Carl se verhoor sou dieselfde week as sy broer se borgtogaansoek begin, maar dié verhoor is nou verskuif tot die einde van volgende maand.
Die staat voer aan dat Carl roekeloos bestuur het toe die fietsryer raakgery is.
Kenny Oldwage, sy prokureur, het aan die nuuskanaal bevestig dat Carl teregstaan op die aanklag en gesê die atleet se broer was nie dronk ten tyde van die ongeluk nie. Oldwage het ook gesê hulle sal bewys dat die motorfietsryer teen sy voertuig gebots het.
Geen verdere inligting oor die saak is bekend gemaak nie.
Carl se atleet-broer is Vrydag borgtog van R1 miljoen in die Pretoriase landdroshof toegestaan. Beamptes het Oscar reeds Saterdag by sy oom, Arnold, se spoghuis in Waterkloof besoek.
Oscar word daarvan beskuldig dat hy sy vriendin, die model Reeva Steenkamp, op Valentynsdag in sy huis in die ooste van Pretoria doodgeskiet het.
Hy is aankla van moord met voorbedagte rade, wat hy ten sterkste betwis.
Die saak teen die Paralimpiese atleet is tot 4 Junie uitgestel.
– Volg Nuus24 op Twitter
