Nóg ’n sakeman deponeer vir Juju
2011-11-06 10:03
Johannesburg – Die sakereus wat Julius Malema, die ANC se jeugleier, na sy bruilof op Mauritius genooi het, het ook hope kontant in Malema se trustrekening inbetaal.
Die eiendomsmagnaat David Mabilu se Vharanani Properties het by meer as een geleentheid bedrae van meer as R100 000 in die Ratanang-familietrust, genoem na Malema se seun, inbetaal.
In Julie het Rapport en City Press die bestaan van dié trust onthul en ’n sakeman van Limpopo aangehaal wat erken het dat hy geld daarin betaal het om Malema te beloon nadat die jeugleier hom gehelp het om ’n staatstender te bekom.
Malema het intussen beweer die trust ontvang slegs skenkings van sakelui wat hom help met welsynsprojekte.
Dié trust, asook ander rekeninge wat aan Malema verbind word, word nou deur die Valke ondersoek.
Twee onafhanklike, ingeligte bronne met kennis van Malema se geldsake het die afgelope week bevestig dat Mabilu een van die skenkers aan dié trust is.
Mabilu is die tweede sakeman wat onthul word as een van Malema se finansiers nadat Steve Bosch, ’n kontrakteur van Polokwane, vroeër vanjaar erken het hy het geld in Malema se trustrekening betaal.
Malema ontken nog deurlopend dat hy ’n miljoenêr is, ondanks sy uitspattige leefstyl.
Benewens sy salaris van die ANC het hy al erken hy ontvang dividende van On-Point Engineering, ’n maatskappy wat deels deur sy familietrust besit word en tendergeld ontvang.
Mabilu het die afgelope week nie op navrae gereageer nie.
Floyd Shivambu, Malema se woordvoerder, het gesê: “Ek dog ons het ooreengekom dat ons nie reageer op futiele visvangery nie. Dit lyk asof julle vasbeslote is om swart vooruitgang te kriminaliseer.”
Die Sunday Times het vroeër berig dat Malema twee uur ná die afloop van sy optog om ekonomiese vryheid in Gauteng met ’n bloulig-konvooi na die O.R. Tambo-lughawe is om met sakeklas na Mauritius te vlieg.
Die troue, wat verskeie glanspersone en burgemeesters van Limpopo-munisipaliteite op die gastelys ingesluit het, het glo tussen R10 en R15 miljoen gekos.
Mabilu het baie van sy geld uit staatstenders gemaak. Sedert verlede jaar het sy maatskappy, Vharanani, meer as R200 miljoen se kontrakte by die regerings van Limpopo en Gauteng gekry.
Mabilu is in Soweto gebore, maar sy wortels lê in Limpopo se Venda-gebied.
Hy het sy fortuin meestal uit staatskontrakte vir bouwerk en watervoorsiening gemaak.
Hy is bekend daarom dat hy dienste van goeie gehalte lewer, maar word gereeld daarvan beskuldig dat hy sy politieke verbintenisse gebruik om tenders te bekom, veral in Limpopo.
Malema was verlede jaar die gasspreker op sy verjaardagpartytjie.
Mail & Guardian het Vrydag berig dat Vharanani in 2007 twee dele van ’n plaas naby Polokwane van twee gelikwideerde maatskappye gekoop het. Hy het later die grond verruil vir ’n stuk uitsoekgrond wat aan die Polokwane-munisipaliteit behoort en ’n bykomende sowat R5,9 miljoen op die transaksie inbetaal.
Kort daarna het Mabilu die grond wat voorheen aan die munisipaliteit behoort het aan Limpopo se departement van plaaslike regering en behuising verkoop vir R51 miljoen – ’n wins van R40 miljoen.
- Rapport