Nóg 'n polisielid skiet vriendin
2011-04-29 09:23
Bloemfontein - Drie kinders van Bloemfontein is nou sonder ’n ma nadat nóg ’n polisieman sy vriendin en homself doodgeskiet het.
Sers. John Filander (35) van die Vrystaatse polisie se beskerming-en-veiligheidsdienste het Donderdag in die vroeë oggendure sy vriendin, Jacoba Christie (34), en homself in Grasland 2, Bloemspruit, met sy dienspistool doodgeskiet.
Christie se kinders, Geraldine (12), Jade (11) en Dale (6), was glo in die huis toe hul ma doodgeskiet is. Sy en die polisieman het nie saam kinders gehad nie.
Dit kom nadat ’n Bloemfonteinse polisieman drie slapende kinders, sy minnares en homself op 15 April geskiet het.
Lt.kol. Annelie Wrensch, polisiewoordvoerder, sê Filander is na Christie se huis. Hy het geweld gebruik om in die huis in te kom.
Hy het Christie vermoedelik vyf keer geskiet en homself toe in die kop geskiet. Albei is in die huis dood.
Volksblad verneem familielede van Christie het Donderdag van Upington na Bloemfontein gekom.
Hulle het Donderdag nie kans gesien om oor die moord en selfmoord te praat nie.
Ao. Daniël Olifant (40), ’n polisiebeampte van Heidedal, het sy minnares, Shirley Scharneck (39), en haar kinders Zwelinzima Linda (5), Zanele Linda (9), Thamsanqa (Thami) Linda (13), en homself vroeër vandeesmaand doodgeskiet.
Die Vrystaatse polisiehoof, lt.genl. Ngwendzeni Sengani, sê dit is tragies dat Filander nie vroeër hulp gesoek het nie.
Volgens Sengani is die gesondheid-en-welstandsdienste vir alle polisielede beskikbaar om hulle met emosionele en sielkundige kwessies te help. “Lede word deurgaans aangemoedig om van die dienste gebruik te maak om tragiese voorvalle soos dié te voorkom.”
Volgens Sengani word bevelvoerders tans opgelei om onder meer waarskuwingstekens van depressie en ander sielkundige kwessies te kan uitken.
Hulle word aangemoedig om pro-aktief op te tree sodat lede betyds hulp kan kry.
- Volksblad