Nóg 'n plaasaanval in Vredendal

2011-11-25 14:22

Kaapstad – 'n Bejaarde egpaar is Vrydagoggend beseer nadat drie mans hulle op hul plaas by Vredendal aangeval het, het Die Burger berig.

Volgens die polisie het die mans in die vroeë oggendure die man en vrou in hul huis op die Spruitdrif-pad oorrompel nadat hulle 'n agterdeur oopforseer het.

Die aanvallers, blykbaar almal Afrikaanssprekend, het die 86-jarige man met 'n skroewedraaier aangeval en sy 84-jarige vrou se bene vasgebind. Hulle het toe die huis deursoek en kontant asook 'n vuurwapen gesteel voordat hulle op die vlug geslaan het.

Die egpaar het mediese behandeling op die toneel ontvang.

Enigiemand met inligting kan kapt. Carn Loock by 027 201 3203 skakel.

Volg Nuus24 op Twitter
 

- Die Burger