Nóg ’n ministerie bestee baie aan motorhuur
2011-08-04 09:07
Kaapstad – Die ministerie van korrektiewe dienste het sedert Maart 2010 meer as ’n halfmiljoen rand aan die huur van motors uitgegee.
Nosiviwe Mapisa-Nqakula, minister van korrektiewe dienste, het Woensdag in antwoord op ’n parlementêre vraag van adv. Lennit Max, DA-LP, besonderhede oor die huur van motors verskaf.
Die minister het by 34 geleenthede gehuurde motors teen ’n koste van R434 373 gebruik.
Die vorige adjunkminister, dr. Hlengiwe Mkhize, het sewe keer motors teen ’n koste van R42 505 gehuur, terwyl die huidige adjunkminister, adv. Ngoako Ramathlodi, ses keer motors gehuur het wat die belastingbetaler R33 355 uit die sak gejaag het.
Luidens Mapisa-Nqakula se antwoord maak die ministeriële handboek voorsiening daarvoor dat ministers ’n amptelike motor vir gebruik in Pretoria en een vir gebruik in Kaapstad kan hê. Die dokument bepaal dat motors gehuur mag word vir gebruik buite dié gebiede.
Die motors word gehuur vir amptelike pligte wat die minister en die adjunkminister buite Gauteng en Kaapstad moet uitvoer as ’n kritieke deel van die openbare deelnameprogram. Die motors stel hulle in staat om hul amptelike pligte en veeleisende skedules na te kom, lui die antwoord.
’n Herrie het vroeër oor die huur van motors losgebars. In die proses het dit aan die lig gekom dat die volgende bedrae sedert Maart 2010 aan die huur van motors bestee is:
- Die ministerie van openbare ondernemings – R201 904;
- Marthinus van Schalkwyk, minister van toerisme, en sy adjunk, Thobile Xasa – R310 888;
- Gwen Mahlangu-Nkabinde, minister van openbare werke, en Geoff Doidge, haar voorganger – R436 911;
- Susan Shabangu, minister van minerale hulpbronne – R251 034;
- Paul Mashatile, minister van kuns en kultuur, en Lulu Xingwana, sy voorganger – R118 083; en
- Rob Davies, minister van handel en nywerheid – R59 183.
Volg Nuus24 op Twitter.
- Die Burger