Nóg ’n minister koop luukse BMW
2009-10-17 08:10
Liesl Peyper
Kaapstad - Me. Maite Nkoana-Mashabane, minister van internasionale betrekkinge, het die vierde minister geword wat ’n weelderige BMW van byna R1,2 miljoen as ampsmotor gekoop het.
Sy het die voorbeeld van haar drie ampsgenote – mnr. Siphiwe Nyanda, minister van kommunikasie, dr. Blade Nzimande, minister van hoër onderwys, en mnr. Trevor Manuel, ’n minister in die presidensie – gevolg en die luukse 7-reeks gekies.
Belastingbetalers het ook vir ’n verdere R103 337 se bykomstighede, waaronder spesiale beligting, opgedok. Die spandabelrige aankope is bekend gemaak in antwoord op ’n vraag van mnr. Kenneth Mubu, DA-LP.
Volgens die DA het pres. Jacob Zuma se ministers en hul adjunkte tot dusver saam byna R44 miljoen aan nuwe ampsmotors bestee en beloop die bykomstighede ook amper R1 miljoen.
Nkoana-Mashabane het op 7 Augustus in antwoord op ’n afsonderlike vraag van die DA gesê haar departement probeer ook geld bespaar. “Verskeie besparingsmaat- reëls word geïmplementeer om hulpbronne aan noodsaaklike dienste en prioriteite te herlei.”
Volgens Mubu is dit ’n leë belofte, “want die dade weerspreek die woorde”.
Me. Tiesa Naude, ’n verkoopskonsultant by ’n BMW-handelaar in Kaapstad, het gesê die 7-reeks-model is een van die luuksste sedans op die mark.
“Al die nuutste voertuig-tegnologie word in dié model vervat.”
Luidens die ministeriële handboek mag ministers tot R2,4 miljoen aan ampsmotors bestee. Maar hoewel dit binne die reëls geskied, is die vraag ter sprake of dit geregverdig is, meen prof. Dirk Kotze van Unisa.
“Die gaping tussen ryk en arm word al groter en politieke ampsdraers is veronderstel om rolmodelle te wees wat nie uitspattig leef nie.”
- Die Burger