Nóg 'n kind sterf ná boelie-voorval

2012-11-21 11:31

Johannesburg – ‘n Tiener sal binnekort in ‘n Durbanse hof verskyn nadat hy na bewering ‘n medeleerder by ‘n skool doodgesteek het, het die polisie in KwaZulu-Natal gesê.

Kol. Vincent Mdunge sê twee tienerseuns het mekaar Dinsdag met messe in ‘n geveg by die Fairvale Secondary School in Wentworth gesteek.

“Al wat ons weet is dat daar twee seuns was wat ‘n onderonsie gehad het, maar ons weet nie wat tot die konfrontasie gelei het nie.”

Beide die leerders is na ‘n hospitaal geneem, waar een van hulle – ‘n 15-jarige seun – aan sy wonde beswyk het. Hy is drie keer in die bors en een keer in sy regterarm gesteek.

Die ander leerder, wat ook in die bors gesteek is, is tans onder sy ouers se toesig in die hospitaal.

Mdunge sê hoewel die polisie nie ‘n toename in geweld tussen skoolkinders opgemerk het nie, is boelies steeds ‘n groot probleem.

Dit volg nadat ‘n 18-jarige seun ‘n ander skolier in ‘n klaskamer by die Phineas Xulu Secondary School in Vosloorus, Ekurhuleni, doodgeskiet het.

Die skieter beweer die oorledene het hom herhaaldelik geboelie.

Volg Nuus24 op Twitter

- SAPA