Nóg ’n hoë mors hope op verblyf
2009-11-20 08:24
Philda Essop
Kaapstad. – Die adjunkminister van toerisme, Thokozile Xasa, het oor ’n tydperk van 34 dae altesaam R116 907 aan hotelverblyf bestee terwyl haar amptelike woning opgeknap is.
Sy sluit haar aan by ander ministers wat duisende rande aan hotelverblyf bestee het terwyl verbeteringe aan hul ampswonings aangebring is.
Marthinus van Schalkwyk, minister van toerisme, het gister in antwoord op ’n geskrewe vraag van Greg Krumbock, DA-LP, gesê Xasa het tussen Mei en Augustus tyd in ’n hotel en luukse gastehuise deurgebring.
Luidens die antwoord het Xasa by tye in Mei, Julie en Augustus in die Sheraton-hotel in Pretoria tuisgegaan teen ’n koste van R77 599.
Die DA het as deel van sy oorsigrol ’n blad op sy webwerf begin waarop alle “vermorste uitgawes” aangeteken en gemonitor word.
Dié syfer staan tans op R326 miljoen.
Thamsanqa Mchunu, woordvoerder van die departement van openbare werke, sal eers vandag op verdere navrae van Die Burger rondom Xasa se huis reageer.
- Die Burger