Nóg 'n getuie wys vinger na ET-beskuldigdes
2011-10-12 12:15
Ventersdorp – ‘n Vyfde getuie sê Eugene Terre'Blanche se vermeende moordenaars het erken dat hulle die AWB-leier vermoor het.
Sers. Jack Ramonyane, ‘n polisiebeampte, het Woensdag in die rondgaande hof op Ventersburg teen die plaaswerker Chris Mahlangu en ‘n minderjarige getuig.
“... Mahlangu het aan my verduidelik dat hulle met hul werkgewer baklei het; oor twee maande se lone wat nie betaal is nie,” het Ramonyane in die hof gesê.
“Ek het hom toe gevra hoe ernstig sy werkgewer beseer is... Mahlangu het gereageer deur te sê: ‘Ons het hom doodgemaak’.”
Ramonyane sê hy het bang gevoel ten tyde van Mahlangu se verduideliking.
“Hy [Mahlangu] het nie soos iemand gelyk wat so iets kon doen nie aangesien hy vry, kalm en nie bang was nie.”
Die beskuldigdes het aan Ramonyane gesê dat hulle genoeg gehad het.
Ramonyane sê Mahlangu het aan hom gesê hy het Terre'Blanche se selfoon gehad en wou dit verkoop om sy agterstallige lone te vergoed.
Die polisiebeampte het op 3 April 2010 die gebied gepatrolleer toe hy op die beskuldigdes naby die plaaslike treinspoor afgekom het.
Vier ander getuies het reeds getuig dat Mahlangu en die tiener erken het dat hulle die misdaad gepleeg het.
Beide het skuld ontken op aanklag van moord, huisbraak en poging tot roof met verswarende omstandighede.
Mahlangu beweer hy het uit selfverdediging opgetree, terwyl die tiener enige betrokkenheid ontken het.
Ramonyane se getuienis duur voort.
Volg Nuus24 op Twitter