Nóg 'n fietsryer raakgery

2013-01-06 07:31

Johannesburg – ‘n Jong vrou is in ‘n kritieke toestand in die hospitaal nadat ‘n voertuig haar in Richardsbaai, KwaZulu-Natal, raakgery het, het paramedici gesê.

Chris Botha, ‘n woordvoerder vir Netcare 911, het in ‘n mediaverklaring gesê die 22-jarige vrou het saam met ander fietsryers gery toe die ongeluk plaasgevind het.

Hy sê die voertuig het op 'n skerp draai in die fietsryer vasgery, oor haar fiets gery en teen 'n lamppaal gebots.

Die vrou is in die Netcare Bay hospitaal opgeneem.

Botha sê die bestuurder van die voertuig is deur die polisie ondervra. Sy passasier het ernstige beserings opgedoen.

Dit volg nadat Suid-Afrika se voorste bergfietsryer, Burry Stander, vroeër die week gesterf het toe hy in Shelly Beach deur 'n minibustaxi raakgery is.

Volg Nuus24 op Twitter

- Nuus24