Nóg ’n brand tref Jhb-middestad
2009-10-21 12:58
Johannesburg – Drie mense is in die hospitaal opgeneem nadat ‘n brand by ‘n gebou in die middestad van Johannesburg uitgebreek het, het nooddienspersoneel gesê.
Volgens Percy Morokane, woordvoerder, het die brand omstreeks 09:00 op die eerste vloer van die Charleston-gebou in Commissionerstraat begin.
Drie mense, ‘n man en twee vroue, is na die Charlotte Maxeke-hospitaal opgeneem vir rookinaseming. Hulle is in ‘n ernstig maar stabiele toestand.
“Na bewering het ‘n matras in die slaapkamer van die woonstel aan die brand geslaan en ‘n dik, swart rookwolk veroorsaak,” het Morokane gesê.
“Die slaapkamer is erg beskadig deur die brand.”
Die vlamme is gou geblus deur brandweerbeamptes van die Johannesburg, Malvern en Fairview brandweerstasies.
“Veiligheidsbeamptes het reeds met City Power gepraat en vasgestel dat die gebou heelwat onwettige bedrading in die gange gehad het. Dit kon moontlik die brand veroorsaak het,” het Morokane gesê.
– Sapa
Was jy op die toneel? Het jy foto's geneem? Stuur dit aan Nuus24.