Nóg 'n boer wreed op sy plaas vermoor

2012-11-26 11:41

Ficksburg – Die polisie is op soek na drie verdagtes wat Saterdagaand 'n egpaar op hul plaas buite Ficksburg in die Vrystaat aangerand het.

OFM berig Phumelelo Dhlamini, ‘n polisiewoordvoerder, sê die polisie vermoed die verdagtes het na Lesotho gevlug.

Volgens die berig sal polisiebeamptes moontlik die hulp van Interpol moet inroep.

Volksblad berig Chris Preece (54) is met ’n panga en messe op sy plaas, Fleur de Lys, doodgekap. Die boer was oorspronklik van Engeland.

Sy vrou, Felicity, het ernstige beserings in die gru-aanval opgedoen.

Die egpaar se skoondogter het aan die dagblad gesê dit was haar skoonpa se droom om sy plaas in ’n natuurreservaat en rehabilitasie-oord vir uile en jagluiperds om te skep.

Volgens die plaaslike polisie was dit die vyfde aanval, en die tweede moord, in die Ficksburg-Rosendal-distrik die afgelope maand.

Volg Nuus24 op Twitter