Nóg 'n aanklag kom teen Oscar

2013-02-20 11:17

Pretoria – Die atleet Oscar Pistorius gaan aangekla word van die besit van ongelisensieerde ammunisie nadat .38 Special-patrone in 'n kluis by sy huis gevind is.

"Ons het 'n boks met 38 Special-patrone gevind," het Hilton Botha, hoofondersoekbeampte in die saak, aan die hof gesê.

Botha het gesê Pistorius het nie 'n lisensie gehad om die patrone te hê nie.

Pistorius word daarvan beskuldig dat hy sy vriendin, die model Reeva Steenkamp, op Valentynsdag in sy huis in die ooste van Pretoria doodgeskiet het.

Die hof het vroeër gehoor dat 'n "nimmereindigende stryery" tussen 02:00 en 03:00 die oggend van die moord in die huis gehoor is.

Die staat het verder aangevoer dat Pistorius 'n vlugrisiko is omdat hy oorsese bankrekeninge en 'n huis in Italië het.

– Volg Nuus24 op Twitter

- AFP