Nog ’n Limpopo-boer sterf
2010-03-03 07:11
Marietie Louw-Carstens
Johannesburg - In die derde moord op die Limpopo-platteland binne vier dae is ’n bejaarde man van Bela-Bela (Warmbad) se lyk gister op ’n hoewe buite die dorp gevind.
Die polisie het gisteroggend op Ron Smith (70) se lyk afgekom op sy bed in ’n rondawel op ’n hoewe in die Droogekloof-gebied sowat 15km op die pad na Thabazimbi.
Supt. Ronel Otto, provinsiale polisiewoordvoerder, het gesê Smith se hande was aan die bed se kopstuk vasgebind. Hy het ’n skietwond in die linkerknie gehad.
Otto het gesê dit lyk of die moordenaar(s) by ’n venster ingekom het.
Van Smith se familie wat in Benoni aan die Oos-Rand woon, het bekommerd geraak toe hulle hom nie in die hande kon kry nie.
Hulle het Dinsdagoggend die Bela-Bela-polisie gebel. Smith is vermoedelik tussen Sondag 20:00 en eergisteroggend vermoor.
Otto het gesê dit is onduidelik of iets uit die rondawel gesteel is.
Die moord kom kort ná twee gru-moorde die naweek in Limpopo.
Etienne Cammaerts (61) is Vrydag op sy plaas in die Lephalale (Ellisras)-distrik keelaf gesny.
Paul Dunn (49), plaasbestuurder van Constantia Produkte, ’n sitrusplaas in die Letsitele-gebied, is Saterdag in die vroeë oggendure doodgeskiet.
Twee mans verskyn Woensdag in die Mokopane (Potgietersrus)-landdroshof weens die moord op Cammaerts, ’n Belg.
Otto het gesê ’n 29-jarige man en sy 20-jarige makker is Maandag laat in die Villa Nora-gebied weens dié moord aangekeer. Niks is van Cammaerts gesteel nie. Sy lyk is op ’n verlate grondpad naby ’n waterpan op die plaas gekry.
Intussen moet Dunn se stiefseun, Ruan (16), berading ontvang nadat hy op sy bebloede lyk afgekom het.
Tanya Dunn het Dinsdag gesê haar seun is uiters geskok.
Sy en Ruan het Vrydagaand in die nabygeleë Tzaneen oorgeslaap. Hulle is Saterdagoggend na die plaas. “Ek bel gewoonlik vir Paul om die hek oop te maak, maar hy het nie geantwoord nie,” het sy gesê.
Sy het by die huis ook die toeter herhaaldelik gedruk, maar daar was geen antwoord nie. Ruan het by die kombuisvenster ingekyk en sy stiefpa se lyk op die vloer sien lê.
“Hy (Ruan) het verskriklik geskree. Ek het gaan kyk en hom daar sien lê... ek was so geskok,” het sy gesê.
“Baie mense is nou kwaad en wil wapens opneem, maar wat sal dit help? Dit gaan nie my man terugbring nie,” het Dunn gesê.
Vyf mense is in Februarie op plase in Limpopo vermoor.
Kallie Kriel, uitvoerende hoof van die burgerregte-inisiatief AfriForum, het Dinsdag gesê hulle het by Fifa beswaar gemaak omdat die WB 2010-stadion in Polokwane (Pietersburg) na Peter Mokaba genoem is. Mokaba was berug om sy slagspreuk “Kill the Boer, kill the farmer”.
“Mokaba was ’n aanstigter tot moord op plaasboere. Nadat sy slagspreuk berug geword het, is meer as 2 000 mense op plase in Suid-Afrika vermoor. Ons is seker Fifa sal nie toelaat dat ’n sokkerstadion na Adolf Hitler genoem word nie. Dit is ’n klap in die gesig van die naasbestaandes van duisende slagoffers van plaasmoorde,” het Kriel gesê.
- Beeld