Nóg mediese afval gestort
2009-12-02 18:41
Johannesburg – Die Groen Skerpioene (die omgewingsbestuurs-inspektoraat) het Woensdag nóg twee stortterreine in Welkom in die Vrystaat waar mediese afval begrawe is, gevind.
Volgens Sonnyboy Bapela, hoof van die Groen Skerpioene, is dié stortterreine op die Jonkerusplaas en die Welkom skougronde gevind.
“Dit is nou ‘n misdaadtoneel,” het hy gesê
Elke toneel is sowat 10 meter in deursneë. Die stortterrein op die skougronde is minstens twee meter diep en verdere opgrawings is gestaak as gevolg van winderige toestande.
“As gevolg van die wind het die mediese afval begin rond waai,” het Bepela gesê.
Die afval is weer begrawe totdat ‘n oplossing vir die afsetting daarvan gevind kan word.
Volgens Bapela het inligting oor die storting van joernaliste wat ‘n onderhoud gevoer het met Gavin Brasher, die eienaar van Maximus Bricks waar die eerste onwettige stortterrein gevind is, gekom
Vroeër die week is die president van die Suider-Afrikaanse instituut vir afvalbestuur (IWMSA), Vincent Charnley, gevra om uit sy amp te tree totdat die ondersoek na die onwettige storting van mediese afval in Welkom, afgehandel is.
- Sapa