Nóg klagtes teen Vodacom-verdagte
2009-11-26 13:30
Johannesburg - Een van die drie mans wat daarvan beskuldig word dat hy Vodacom-kliënte bedrieg het, het glo ook ‘n regsfirma uit sowat R2 miljoen gekul.
Hierdie inligting het Donderdag in die hof vir kommersiële misdaad in Johannesburg op die lappe gekom.
Mbusi Bhengu, wat van sowat R8 miljoen se bedrog verdink word, staar nou nóg klagtes in die gesig nadat hy die prokureurs glo van sowat R2 miljoen besteel het.
Die naam van die firma is nie bekendgemaak nie.
Twee vroue en twee Nigeriërs was glo Bhengu se medepligtiges. Al vier is in hegtenis geneem maar was nie Donderdag in die hof nie.
Die saak is tot 29 Maart 2010 uitgestel.
–Sapa