Nog geen probleme met petrol
2011-07-12 09:00
Bloemfontein - Hoewel petrolpompe landwyd vinnig kan leegloop, is daar nog geen probleme met beskikbaarheid van brandstof in die Vrystaat en Noord-Kaap nie.
Duisende werkers van die nywerheidschemikalieë- en petroleum-sektor het Maandag begin staak.
Sowat 17 000 van hul lede van die metaalwerkersvakbond Numsa staak. Honderde lede van die Chemical Energy Paper Printing Wood and Allied Workers’ Union (Ceppwawu) wat werkers in sewe verskillende sektore verteenwoordig, neem ook aan die staking deel.
Albei vakbonde dring op ’n 13%-salarisverhoging en die afskaffing van arbeidsmakelaars aan.
Verteenwoordigers van PetroSA het die naweek reeds vrese uitgespreek dat vulstasies sal moet sluit as die staking te lank uitgerek word.
Peter Noke, nasionale direkteur van die Suid-Afrikaanse Petroleum-kleinhandelaarsvereniging, sê die staking sal eers later die week ’n krisispunt bereik.
“Die meeste diensstasies sou volgemaak het. Die probleem is die bergingskapasiteit. Al is daar voorsiening gemaak, sal daar slegs vir ongeveer vier dae brandstof wees.”
Noke sê hoewel dit oor vraag en aanbod gaan en dit moeilik is om presies te bepaal hoe lank daar nog brandstof beskikbaar kan wees, sal tekorte van Donderdag af begin voorkom.
“Die probleem met die staking is dat voertuie nie by die depots sal kan uitkom nie.”
Noke sê vakbonde sukkel om hul lede te beheer.
“Werknemers wil dinge moeilik maak omdat hulle werkgewers wil dwing om aan hul vereistes te voldoen.”
Hy sê groot paniek is nog nie nodig nie maar mense moet sorg dat hul motors se brandstoftenks liefs bo die halfpadmerk is.
In Bloemfontein is daar nog volop brandstof beskikbaar.
Johan Brits berig Johan Malan, eienaar van die Shell Dakota Motors-vulstasie op Kroonstad, sê hulle vat dit dag tot dag.
“Dit is moeilik om te voorspel, maar vandag (Maandag) is alles nog reg hier.”
Dié vulstasie is een van die besigste en grootste op Kroonstad.
Die Total-vulstasie op Heilbron het Maandagoggend ’n brandstoftekort gehad, maar ’n noodvrag is gestuur.
Die Engen-Kroonvaal op die N1-hoofweg buite Parys het gister nog geen brandstofprobleme ervaar nie.
Vulstasies in die Goudveld het voorsiening gemaak vir ’n moontlike tekort aan petrol, berig Tom de Wet.
Carel Preller van Etienne Motors (Engen), die grootste vulstasie in die Goudveld, sê hulle kry hul brandstof van die depot op Kroonstad, wat per pypleiding direk met die raffinadery verbind is. By die vulstasie het hulle hul daaglikse aankoop van brandstof bykans verdriedubbel en gaan dit so hou totdat die brandstof by die raffinadery en depot opdroog.
Phillip van der Merwe van Flamingo Motors (Shell) sê hulle het ook voorsorg getref, maar teen gister was daar nog nie meer motoriste wat hul motors kom vol maak het nie.
Willem van der Berg berig Quintin Fincham van die Primestop Engen op Bethlehem sê daar is nog geen brandstoftekort hier nie.
In die Noord-Kaap is geen tekorte nog aangemeld nie. Tom Burger, bestuurder van Shell in Bultfonteinweg in Kimberley, het aan André Damonsgesê meer mense het Maandag petrol ingegooi as gewoonlik.
- Volksblad