Nog geen kontak tussen ANCYL, Mbeki
2012-01-11 19:47
Johannesburg – Oudpresident Thabo Mbeki se kantoor het teen Woensdag nog geen kontak van die ANC-Jeugliga gehad rakende ‘n moontlike vergadering met hom nie, het sy woordvoerder, Mukoni Ratshitanga, gesê.
Die geskorste president van die ANCYL, Julius Malema, het Dinsdag tydens ‘n onderhoud op Safm gesê dié organisasie sou ‘n vergadering met Mbeki aanvra om hom te oortuig om meer sigbaar en uitgesproke oor Suid-Afrika se ekonomie en beleid te word.
Dit is nie die eerste keer dat Malema Mbeki prys nie. In Junie verlede jaar het hy gesê Mbeki is een van die beste kaders nóg uit die ANC. In 2008 het hy hom egter gekritiseer en gesê hy moet deur President Jacob Zuma vervang word.
Malema het hom destyds ‘n “diktator” en ‘n “dooie slang” genoem, na aanleiding van Regter Chris Nicholson se uitspraak in 2008 dat Mbeki ingemeng het by die sake van die Nasionale Vervolgingsgesag en die vervolging van Zuma.
Mbeki is later deur die ANC “herroep” as president, voordat Nicholson se beslissing in 2009 omgekeer is deur die appèlhof.
Ratshitanga het Dinsdag aan Timeslive gesê Mbeki sal geen probleem hê met ‘n vergadering met die ANCYL nie.
“Die voormalige president het aangedui hy is bereid om met enige Suid-Afrikaner te vergader as hy tyd het. Die aanvraag sal soos ander aanvrae hanteer word. “
Aubrey Matshiqi, politieke analis verbonde aan die Helen Suzman Stigting, het gesê daar is twee moontlike redes vir Malema se verandering van standpunt teenoor Mbeki.
“Een kan wees dat hy werklik van siening verander het. Die ander moontlikheid is dat Mbeki slegs ‘n wapen kan wees in ‘n politieke stryd om te onderstreep wat beskou word as swak leierskap van Jacob Zuma,” het hy gesê.
Malema het onlangs liedjies gesing waarin hy na Zuma as “Die Stortman” verwys. Dit is ‘n verwysing na Zuma wat in 2006 aan die Hooggeregshof in Johannesburg gesê het hy het gestort om te voorkom dat hy MIV kry nadat hy onbeskermde seks met ‘n MIV-positiewe vrou gehad het.
Dit was tydens ‘n saak van verkragting teen hom. Hy is vrygespreek.
- Volg Nuus24 op Twitter
- SAPA