Nóg een vas vir gewapende roof in BFN

2013-01-11 08:20

Bloemfontein – Die polisie het 'n derde verdagte in hegtenis geneem in verband met ‘n gewapende rooftog wat vroeër die week buite die Rosestad plaasgevind het.

OFM berig ‘n polisiesersant en rower is tydens die voorval doodgeskiet en twee konstabels is gewond.

Harry Nagel, ‘n polisiewoordvoerder, sê die drie verdagtes – 29, 30 en 31 jaar oud – sal binnekort in Bloemfontein se landdroshof op aanklagte van moord, poging tot moord en gewapende roof verskyn.

Sers. Molahlehi Ephraim Mokhasi (41) het ná die rooftog by 'n Chinese algemene handelaar in Kopanong in 'n oor-en-weer-skietery tussen die polisie en ses mans gesterf. ‘n Rower is ook in die proses dood.

Die radiostasie berig twee ander polisiekonstabels is raakgeskiet, maar sterk goed aan.

Polisiebeamptes is nog op soek na twee ander verdagtes.

Volg Nuus24 op Twitter