Nog drie operasies wag op hartbaba
2010-01-23 14:30
Susan Cilliers
Johannesburg - Minstens drie groot hartoperasies lê nog vir klein Ashleigh-Karin Louw voor nadat sy twee weke gelede in die Chris Hani Baragwanath-hospitaal met ’n seldsame ontwikkelingsafwyking gebore is.
Die toestand, pentalogie van Cantrell, veroorsaak dat Ashleigh-Karin se borsbeen, diafragma en maagwand nie voor haar geboorte behoorlik ontwikkel het nie. ’n Gedeelte van haar hart en ingewande is buite haar borskas.
Haar maagwand en diafragma is intussen herstel, die ingewande teruggeplaas en haar hart sover moontlik in haar borskas teruggedruk. Sy is steeds in ’n kritieke, maar bestendige toestand.
Prof. Antoinette Cilliers, pediatriese kardioloog, het gesê Ashleigh-Karin het ook verskeie hartafwykings, bekend as trikuspedale atresie.
“Dié defekte kan omseil word, maar Ashleigh-Karin sal nooit ’n normaal funksionerende hart hê nie.”
’n Gesonde hart funksioneer soos volg: Suurstofarm bloed word in die boonste regterkantste hartkamer (regteratrium) gestort. Dié bloed vloei deur ’n klep afwaarts na die onderste regterkantste hartkamer (regterventrikel). Die regterventrikel pomp die bloed dan deur ’n aar na die longe, waar die suurstofarmbloed weer suurstof kry.
Die suurstofryke bloed word hierna uit die longe in die boonste linkerkantste hartkamer (linkeratrium) gestort.
Hiervandaan vloei dit afwaarts deur ’n klep na die onderste linkerkantste hartkamer (linkerventrikel). Dié ventrikel pomp die suurstofryke bloed deur die aorta na die hele liggaam.
Ashleigh-Karin se regterventrikel is onderontwikkel. Daar is ook openinge tussen die linker- en regterventrikel en tussen die linker- en regteratrium.
“Dít alles veroorsaak dat suurstofryke en suurstofarm bloed meng en die bloed wat deur die aorta in Ashleigh-Karin se liggaam teruggepomp word nie genoeg suurstof het nie. Te veel bloed word ook in haar longe gepomp.”
Volgens Cilliers sal die aar wat die bloed na die longe pomp gedeeltelik gebind moet word. Later sal suurstofarmbloed vanaf die bolyf direk na die longe herlei word.
Suurstofarmbloed sal ook vanuit haar onderlyf herlei word.
- Die Burger
