Nóg bewerings teen karate-instrukteur
2011-11-15 17:55
Johannesburg – Nóg bewerings sal na verwagting gemaak word teen 'n karate-instrukteur wat daarvan beskuldig word dat hy studente by 'n karatesaal in Douglasdale, Johannesburg, molesteer het, het die Randburg-landdroshof Dinsdag gehoor.
Dít is volgens getuienis wat tydens 'n borgtogverhoor deur die instrukteur gemaak is. Sy naam mag nie bekend gemaak word totdat hy gepleit het nie.
Ao. Joel Ngobeni het aan die hof gesê nóg drie studente beweer die instrukteur het hulle molesteer.
Ngobeni het gesê dié drie studente het hom Maandag genader en hul verklarings sal Dinsdagaand geneem word.
Die 68-jarige man is op 7 November in hegtenis geneem nadat hy die meisies na bewering op ongepaste wyse betas het.
Ngobeni kon nie bevestig of die instrukteur voorheen veroordeel is nie.
– Volg Nuus24 op Twitter
- SAPA